Folio 189v

 

por Castilla dan los pregones, por tan buen rey que alçaron.

Este fue el primero rey que castellanos ovieron,

con grand onra e grand prez grandes alegrías fezieron.

E el buen rey Sancho Avarca començó de reinar,

e mandó fazer señas tendidas en cada logar.

Con fija del rey de Françia se ovo a desposar,

e diógela de grado, non le fezieron ál.

E la infanta dizen doña Isabel, e ésta fue reina de prestar.

El rey don Sancho Avarca fue por ella, ca tiempo avía de casar con ella.

A los puertos de Aspa ge la traxieron,

e el rey de Françia, e él allí fue a tomarla.

Grandes alegrías han en España quando el rey con la reina vieron tornar,

e mayor los castellanos quando la mano le fueron besar.

E el conde don Pedro de Palençia, a Burgos le fue conbidar,

‘Rey don Sancho Avarca, por amor de caridat,

fijo del conde don Sancho, mi señor natural,

vayamos a Palençia, mio conbite tomar,

ca siempre vos serviré mientra mi vida durar.’

Dixo estonçe el rey bueno, ‘Fazerlo he de grado,

en tal que en la mi vida nunca seades menguado.’

Esto fue nueve días ante de Sant Johan,

quando el rey don Sancho llegó a Palençia yantar.

Bravo era el val de Palençia, ca non avía í poblado,

si non do llaman Santa María el Antigua, do morava el conde loçano.

Saliéronse a folgar, desque ovieron yantado,

e passaron las aguas amos de mano a mano.

Afondósse la mula con el rey en un soterraño,

acórrense las gentes e sacaron al rey en salvo,

por los braços quebró la mula, non la cavalgó más omne nado.

El rey tendió los ojos e vio por el soterraño,

desçender una escalera de un canto labrado.

Demandó por un cavallero que dezían Bernardo,

diz, ‘Entra, Bernardo, por essa escalera e cata este soterraño.’

Dixo Bernaldo, ‘Señor, plázeme de grado.’

Bernardo, quando desçendió, vio un poço cavado,

e a par de aquel poço vio estar un altar,

e de suso un escripto, e començólo de catar,

falló que sant Antolín mártir yazía en aquel logar.

E vio una piedra con letras e començóla de catar,

e vio que treçientos años avía que era somido aquel logar.

E vínosse para el rey e díxol‘ en poridat,

‘Señor, commo me semeja, cuerpo santo yaze en este logar.’

Quando el rey al conde fue tornado.